Tuesday, July 5, 2011

Хэвлэлийн бага хурал болно

Өнөөдөр буюу 7 сарын 06-ны өдрийн 11.00 цагаас Солонгост болсон ажлын байрны өдөрлөгийн тухай хэвлэлийн бага хурал Хэвлэлийн Хүрээлэнд болно. Хэвлэлийн бага хуралд Цахим Өртөө Холбооны гишүүд, БНСУ-ын Аж Үйлдвэрлэл, Хүний Нөөцийн Хэрэг Эрхлэх Газрын Монгол Улс дахь суурин төлөөлөгч Юү Мён Сү, Хөдөлмөрийн Төв Биржийн төлөөлөл болон Мобиком Корпорац, MCS групп, Энержи Ресурс, Гандирс зэрэг компаниудын төлөөлөл оролцоно.

Monday, July 4, 2011

Нээлттэй өдөрлөгийн тухай нэвтрүүлэг МҮОНТВ-р

Өнөө орой буюу 7 сарын 5-ны орой 22.00 цаг, маргааш буюу 7 сарын 6-ны орой 22.25 цагаас БНСУ-д болсон "Монгол дахь ажлын байрны нээлттэй өдөрлөг"-ийн тухай нэвтрүүлэг гарна. МҮОНТВ-ийн нэвтрүүлэг төлөвлөлт, хяналтын албаны дарга Б. Оюунчимэг, зураглаач Цэвэлсүрэн нар уг үйл явдлыг газар дээрээс нь сурвалжилж нэвтрүүлэг бэлтгэсэн билээ.

Sunday, June 26, 2011

"Монгол дахь ажлын байрны нээлттэй өдөрлөг - Солонгост 2011" үйл ажиллагаа амжилттай болж өндөрлөлөө

БНСУ-д ажиллаж, сурч, амьдарч буй элэг нэгт Монголчууд аа!

Хоёр сар илүү хугацаанд бэлтгэсэн "Монгол дахь ажлын байрны нээлттэй өдөрлөг - Солонгост 2011" үйл ажиллагаа маань 6 сарын 25, 26-ны өдөр Сөүл, Бусан хотноо тус тус амжилттай болж өндөрлөлөө.

Сөүлд 350 орчим, Бусан хотод 250 орчим монголчууд хүрэлцэн ирж, идэвхтэй оролцлоо. БНСУ дэлхийн 15 орноос ажиллах хүч авдагаас анх удаа Монгол Улс өөрийн орон дахь нээлттэй ажлын байрны өдөрлөг зохион байгуулж байгаа юм байна.

Солонгост өдөрлөгийг газар дээр нь хийж гүйцэтгэсэн баг маань одоо буцах замдаа яваа бөгөөд Монголдоо ирсэн хойно илүү дэлгэрэнгүй мэдээ, мэдээллийг Та бүхэнд хүргэе. Мөн Монголоос энэхүү үйл ажиллагааг сурвалжлахаар ирсэн хэвлэл мэдээллийнхэн өөрсдийн сувгаар олж харсан сонин содон зүйлээ олон нийтэд хүргэнэ.

"Цахим Өртөө Холбоо" ТББ


Friday, June 24, 2011

Солонгос дахь монгол оюутнууд тусалж байна

Солонгос дахь өдөрлөгийг зохион байгуулахад тус улс дахь монгол оюутны холбоо буюу СМОХ-ын гишүүд бүтэн баг гарган оролцож байна. Тэд Сөүл, Бусан хоёр хотод зэрэг ажиллаж бүх бэлтгэл ажлыг гардан гүйцэтгэж байна.
Оюутнууддаа маш их баярлалаа.

МҮОНТВ, Ийгл ТВ нэвтрүүлэг хийнэ

Энэ ирэх хагас бүтэн сайнд болох "Монгол дахь ажлын байрны нээлттэй өдөрлөг-Солонгост 2011" арга хэмжээг сурвалжлахаар Монголоос МҮОНТВ болон Ийгл ТВ-ийн сэтгүүлч, зураглаачдын баг Сөүл хотноо хүрэлцэн ирээд байна. Тэд энэхүү үйл ажиллагааг газар дээрээс нь сурвалжлан нэвтрүүлэг бэлтгэж олон нийтэд цэнхэр дэлгэцээр хүргэхээс гадна онлайн ТВ-р хүргэх юм.

Бүсанд өдөрлөгийн үеэр иргэний шинэчилсэн бүртгэл хийнэ

Энэ бүтэн сайн өдөр буюу 6 сарын 26-ны өдөр Бүсан хотноо болох "Монгол дахь ажлын байрны нээлттэй өдөрлөг-Солонгост 2011" арга хэмжээний үеэр иргэний шинэчилсэн бүртгэл хийгдэнэ. Уг ажлыг БНСУ дахь МУ-н элчин сайдын яам, Бүсан хот дахь өргөмжит консул, төрийн бусад байгууллагын дэмжлэгээр зохион байгуулж байна.
Бүсанд өдөрлөг болох газрын мэдээллийг эндээс үзнэ үү.

Өдөрлөгт оролцох төлөөлөгчид Сөүлд хүрэлцэн ирэв

"Монгол дахь ажлын байрны нээлттэй өдөрлөг - Солонгост 2011" өдөрлөгт оролцох төрийн байгууллага, ТББ, компаниудын хүний нөөцийн албан төлөөллүүд, хэвлэл мэдээллийнхэн БНСУ-н Сөүл хотноо хүрэлцэн очоод байна.
Тухайлбал, Мобиком корпорацийн Захиргааны албан захирал Б. Баярмаа, хүний нөөцийн мэргэжилтэн М. Соёлчимэг, MCS группын хүний нөөцийн менежер Б. Цолмон, АПУ ХК-ийн хүний нөөцийн ахлах мэргэжилтэн Т. Одгэрэл, Шунхлай группын хүний нөөцийн ахлах мэргэжилтэн П. Ганцэцэг, Энержи Ресурс компанийн хүний нөөцийн албаны дарга Д. Батгэрэл нарын Монголын томоохон компаниудын төлөөллүүд уг өдөрлөгт оролцож, нээлттэй ажлын байр, цалин хөлсний нөхцөл, ажилчдын нийгмийн халамж зэргийн тухай танилцуулж, ажлын байр сонирхсон хүмүүсийн анкетыг хүлээн авч, ярилцлага хийнэ.
Мөн өдөрлөгт Хөдөлмөрийн Төв Биржийн төлөөлөл оролцож, уг бирж дээр бүртгэлтэй нээлттэй ажлын байрны тухай танилцуулгыг хийж, сонирхогчдийн анкетийг хүлээн авах юм.

Tuesday, June 21, 2011

INVITATION: Tsahim Urtuu Job Fair Korea 2011 in Seoul & Busan

БНСУ-д ажиллаж, сурч, амьдарч буй элэг нэгт Монголчууд аа!

Та бүхэнд энэ өдрийн халуун мэндийг Цахим өртөөний хамт олон, Монголын топ аж ахуйн нэгжүүдийн хүний нөөцийн албадаас хүргэж байна.

1999 онд байгуулагдсан Гадаадад суугаа монголчуудын Цахим өртөө сүлжээ, түүний вэб хуудаснаа олон мянган монголчуудын дунд Гадаадад хэрхэн суралцах вэ, Гадаадад хэрхэн ажиллах вэ, Хэрхэн ногоон карт авах вэ сэдвээр мэдээ мэдээлэл түгдэг байсан нь саяхан. Гэтэл өнөөдөр хэлэлцүүлгийн сэдвийн чиглэл нь өөр болох шаардлагатай цаг үетэй бид нүүр тулжээ.

Чухамдаа тухайн үед мөн л элэг нэгт та бүхний нэгэн адил гадаадын улс орнуудад ажиллаж, сурч, амьдарч байсан Цахим өртөөчид эхнээсээ эх орондоо эргэн ирж, нийгмийн бүхий л салбарт өөр өөрсдийн замналаар ажиллаж, амьдарч, Монгол дахь нийгэм, эдийн засгийн БОДИТ БАЙДАЛ-тай нүүр тулж байна. Басхүү өөрсдийн сурч мэдсэн туршлагаа ажлын байр, амьдрах орчиндоо түгээж, эх орны хөгжлийн хөдөлгүүрт багахан ч атугай хувь нэмэр болж байгаа нь ирж буй цагийн өнгө гэлтэй.

Тийм ээ, Цахим Өртөөчид өнөөдөр хэрхэн гадаадад гарах тухай бус, харин хэрхэн, яаж, хэзээ Монголдоо ирэх тухай мэдээлэл түгээхээр зориглолоо.

Хөдөө -> аймгийн төв -> нийслэл -> гадаадын улс орнууд гэсэн миграци буюу нийгмийн гоц үзэгдэл Монголд түгээмэл болоод 20 жил боллоо. Саяхан болсон хүн амын тооллогоор 107 мянган (албан бус тоогоор 160 мянга орчим) Монголчууд гадны улс орнуудад ажиллаж байгаа нь нэг талаас brain drain / human capital flight буюу оюунлаг, мэргэжлийн өндөр чадавхитай, мэргэшсэн ажиллах хүчний гадагшаа чиглэсэн миграцийн урсгал хүчтэй илэрч, улмаар нийгэмд чадварлаг мэргэжилтэн, мэргэшсэн ажилчдын хомсдолыг бий болсныг нотолж байна. Монгол Улсын Засгийн газраас 2011 оныг “Хөдөлмөр эрхлэлтийг дэмжих жил” болгон зарласан бөгөөд ойрын хугацаанд уул уурхай, барилга, дэд бүтэц зэрэг салбарт нийт 70 мянган шинэ ажлын байр бий болох гэж байгаа ч мэргэжилтэй ажилчдын тоо 30 мянга хүрэхгүй байна.

Өнөөдөр уул уурхайн салбарын үсрэнгүй хөгжлийн нөлөөгөөр эдийн засгийн өсөлт хурдасч, үүнийг дагаад гадаад дотоодын хөрөнгө оруулалттай бүхий л компани, аж ахуйн нэгжид мэргэжлийн болон оюуны өндөр чадавхитай боловсон хүчин болон мэргэшсэн ажилчдын хэрэгцээ асар их өслөө. Тэдгээр ажлын байруудын цалин хөлс, нэмэлт урамшууллын нөхцөл гадаад орнуудаас тухайлбал БНСУ-аас дутахааргүй, зарим тохиолдолд хэд дахин илүү байна.

Учир иймд бид энэ удаа БНСУ-д ажиллаж, сурч, амьдарч буй элэг нэгт Монголчууд Та бүхэндээ Монголын эдийн засгийн өнөөгийн чиг хандлага, хүний нөөцийн зах зээл, нээлттэй ажлын байрны мэдээллийг түгээх зорилгоор дотоодын олон ажил олгогч компаниудын хамт "Монгол дахь ажлын байрны нээлттэй өдөрлөг Солонгост - 2011" үйл ажиллагааг зохион байгуулж байна.

Цахим өртөө Холбоо ТББ-аас 2009 онд санаачилсан "BRAIN GAIN: Гадаадад суугаа монгол мэргэжилтнүүдийн оюуны урсгал, миграцийн чиглэлийг өөрчлөх нь" төслийн хүрээнд бид АНУ-ын Вашингтон, Сан-Франциско хотуудад БСШУЯ болон, төр, олон нийт, хувийн хэвшил, ажил олгогч байгууллагуудын хамт АНУ дахь Монголчуудад зориулсан "Монгол дахь ажлын байрны нээлттэй өдөрлөг - 2010" үйл ажиллагааг 2010 оны 2 дугаар сард анх удаагаа амжилттай зохион байгуулсан нь уг үйл ажиллагааг цаашид тогтмол явуулах бодит шаардлага байгаа талаар бид гүн итгэл үнэмшил олж авсан юм.

Эх орноос ирж буй САЙН МЭДЭЭГ та бүхэн ирж сонсоорой. Өртөөлөн ирж буй Монголынхоо ажил олгогч компаний төлөөлөгч нартай Та заавал нүүр тулан уулзаарай. Та өнөөдөр эх орондоо ажиллаж амьдарч, аав ээж, гэр бүлтэйгээ ойр амьдрах цаг ирсэн байж болно. Цаг нь ирээгүй ч байхыг үгүйсгэхгүй. Ямартаа ч Та заавал уг арга хэмжээнд хүрэлцэн ирээрэй.

Тун удахгүй бүгдээрээ Сөүл, Бүсан хотуудад уулзалцгаая.

Мэндчилсэн,

Туульч-Өөлд Д.Сайнбаяр
Цахим Өртөө Холбоо ТББ-ын Удирдах Зөвлөлийн Дарга
http://www.tsahimurtuu.mn/ 

Monday, June 20, 2011

2011.06.21: Өдрийн сонинд хэвлэлийн бага хурлын тухай мэдээ гарав

Хэвлэлийн бага хурал

Өнөөдөр буюу 2011 оны 6 сарын 20-ны өдрийн 12.00 цагт МҮОНТВ-ийн Олон нийтийн мэдээллийн төд "Монгол дахь нээлттэй ажлын байрны өдөрлөг Солонгост - 2011" үйл ажиллагааны талаар мэдээлэл хүргэх хэвлэлийн бага хурал боллоо.
Тус хуралд Цахим Өртөө Холбооны Удирдах зөвлөлийн гишүүн М. Тулгат, Б. Лутаа, гишүүн Ж. Саруултуяа болон БНСУ-н Аж Үйлдвэр Хүний Нөөцийн Хэрэг Эрхлэх Газарын Монгол дахь төлөөлөгч Юү Мён Сү нар оролцов.

Thursday, June 9, 2011

Өдөрлөгийн хөтөлбөр

  • Өдөрлөгийн зорилго, зохион байгуулагч байгууллагуудын танилцуулга
  • Видео бичлэг (нийгмийн зүтгэлтнүүдийн уриалга)
  • Монголын эдийн засгийн 1921-2009 он хүртэлх түүхэн замнал, гол үзүүлэлтүүд (ДНБ, хүний хөгжлийн индекс г.м)
  • Эрчтэй хөгжиж буй салбарууд дахь 60 мянган шинэ ажлын байрны боломжийн тухай тойм 
  • Дутагдаж буй мэргэжилтнүүд, ажлын байрууд, цалин хангамжийн нөхцлийн танилцуулга
  • Компаниудын  танилцуулга
  • Хэлэлцүүлэг, асуулт хариулт
  • Ажлын байрны ярилцлага буюу Job interview

Tuesday, May 31, 2011

ӨДӨРЛӨГТ БҮРТГҮҮЛЭХ

БНСУ-д ажиллаж амьдарч буй монгол ахан дүүс ээ,

Та бүхнийг 2011 оны 6 сарын 25-26-ны өдрүүдэд Сөүл болон Бүсан хотуудад зохион байгуулагдах "Монгол дахь ажлын байрны нээлттэй өдөрлөг Солонгост 2011" арга хэмжээнд оролцохыг урьж байна.
Та энэ өдөрлөгт оролцсоноор та:
  • Монголын топ компаниудын хүний нөөцийн албаны захирал мэргэжилтнүүдтэй нүүр тулан уулзаж ярилцах
  • Нээлттэй байгаа ажлын байрны мэдээллийг авах
  • Ажилд орох өргөдөл гаргах, анкет бөглөх
  • Ажилд орох боломжтой.
Та өдөрлөгт оролцох хүсэлтэй бол энд дарж бүртгүүлнэ үү.

Бүсанд хаана болох вэ?

Монгол дахь ажлын байрны нээлттэй өдөрлөг Бүсан хотод 2011 оны 6 сарын 26-ны 12.00 цагаас 15.00 цагийн хооронд зохиогдоно.

Хаяг: Бүсан хот дахь Солонгосын аж үйлдвэрлэл хүний нөөцийн хөгжлийн агентлагийн байр  부산한국산업인력공단
Вэб: http://busan.hrdkorea.or.kr/ 
Автобус: 15, 121, 111-2 , дугаарын автобус очно
Метро: 2-р шугам Yulli station(율리역) 3-р гарц
Утас: 051-330-1910
Лавлах утас: 010-2980-9996, 010-3057-7688



 Бүсан хот дахь Солонгосын аж үйлдвэрлэл хүний нөөцийн хөгжлийн агентлагийн байр

 Метроны буудал

Сөүлд хаана болох вэ?

Монгол дахь ажлын байрны нээлттэй өдөрлөг 2011 оны 6 сарын 25-ны өдөр 12.00-17.00 цагийн хооронд Сөүл хотод зохиогдоно.
Чуулган болoх газар: Солонгосын аж үйлдвэрлэл хүний нөөцийн хөгжлийн агентлагийн байр 한국산업인력공단
Хаяг: 서울시 마포구 백범로31길 21 (공덕동 370-4) (우)121-757
Автобус: 110, 163, 604, 730, 7016, 7613 дугаарын автобус очно
Метро: 6-р шугамын (626) болон 5-р шугамын (529) 공덕역(Gongdeok Station), 2-р гарцаар гараад 150 метрт
Болох огноо: 2011.06.25 өдөр 12 цаг
Утасны дугаар: 1644-8000
Лавлах утас: 010-4728-7743, 010-2834-8028, 010-3147-6400, 010-3841-4498










Солонгосын Үйлдвэрлэл Хүний нөөцийн Агентлагийн байр

Цахим Өртөөчид Солонгост Job Fair зохион байгуулна

Алс хөдөөнөөс аймгийн төв, аймгийн төвөөс нийслэл, нийслэлээс гадаадын улс орнууд руу чиглэсэн их нүүдэл Монгол Улсад түгээмэл үзэгдэл болоод даруй 20 жилийг үдлээ. Дэлхийн олон орны түүхэнд, тухайлбал 1960-1990-ээд онуудад Флиппин, БНХАУ, Япон, БНСУ зэрэг улсуудад энэ үзэгдэл давтагдаж байсан бөгөөд үүнээс үүдэж үндэсний эдийн засаг нь жил бүр олон тэрбум долларын алдагдал хүлээж байсныг UNDP-ийн судалгаа харуулдаг.
Тэгвэл мөн олон улс орон төрийн бодлогынхоо хүрээнд энэхүү миграцийг эсрэг зүгт чиглүүлэн буцааж, гадаадад мэргэшсэн мэргэжилтнүүдээ эх оронд нь эргэн татах бодит алхмууд хийж иржээ. Гадаадад нийт ажиллах хүчнийхээ 15 гаруй хувийг алдаад байгаа Монгол улс энэхүү асуудалд бодит алхам хийх түүхэн цаг үе нэгэнт тулж ирээд байна. Өнөөдөр албан бус тоогоор 200 000 орчим Монголчууд гаднын улс орнуудад ажиллаж буй нь нэг талаас brain drain / human capital flight буюу мэргэжлийн болон оюуны өндөр чадавхийн урсгалыг гадагш алдаж, улмаар нийгэмд өндөр чадвар бүхий мэргэжилтнүүдийн хомсдолыг бий болгох аюул үүсгэж байгаа билээ.
Цахим Өртөө Холбоо ТББ нь эх орныхоо өмнө тулгамдаж буй дээрх асуудлыг шийдвэрлэхэд хувь нэмэр оруулах үүднээс Монгол мэргэжилтнүүдийн оюуны урсгал, ажиллах хүчний урсгал, миграцийн чиглэлийг эргүүлэн татах төслийг санаачлан хэрэгжүүлж эхлээд байна.
Төслийн эхлэл болгож Цахим Өртөө Холбоо ТББ нь АНУ-ын Вашингтон, Сан Франциско хотуудад БСШУЯ, МонАме, Монгол Улсаас АНУ-д суугаа ЭСЯ, Америк дахь Монгол Залуу Мэргэжилтнүүдийн Нийгэмлэг, Бай Ариагийн Монголчуудын Холбоо, Вашингтон хот орчмын Монголчуудын Холбоо, Вашингтон хот орчмын Монгол Сургуультай хамтарч 2010.01.26 - 2010.02.03-ны өдрүүдэд Монгол дахь ажлын байрны нээллтэй өдөрлөг АНУ-д арга хэмжээг амжилттай зохион байгуулжээ. Уг арга хэмжээнд Петровис ХХК, Оюуны Ундраа ХХК, MCS, Юнител ХХК, Жи Мобайл ХХК, Хөтөлийн цемент шохой ХХК, Хас Банк, Капитал групп-ын хүний нөөцийн албаны мэргэжилтнүүд оролцож, Вашингтон хотод 200 орчим, Сан Франциско хотод 100 орчим монгол мэргэжилтэн залуустай нүүр тулан уулзаж, ажлын ярилцлага хийсэн. АНУ-д зохиогдсон хамгийн анхны өдөрлөгийн үр дүнд 20 монгол мэргэжилтэн эх нутагтаа буцан ирж дээрхи компаниудад ажиллах гэрээ хийсэн явдал билээ.

Монгол дахь ажлын байрны нээллтэй өдөрлөг Солонгост-2011 арга хэмжээг Ньюком Групп, Хьюндай Моторс, Энержи Ресурс, MCS, UFC, QGX, Мобиком Корпораци, Моннис групп, Мон Роуд, Петровис зэрэг компаниудын ивээн тэтгэлэг, Солонгосын Аж Үйлдвэр, Хүний Нөөцийн Хөгжлийн Хэрэг Эрхлэх Газар, Хилийн Чанадад Амьдарч буй Монгол Улсын Иргэдтэй Хамтран Ажиллах Зөвлөл, Монголын Ажил Олгогч Эздийн Нэгдсэн Холбоо, Монголын Хөдөлмөрийн Төв Бирж, НДЕГ, ХААН банк зэрэг байгууллагуудын дэмжлэгээр 6 сарын 25-26-ны өдрүүдэд БНСУ-н Сөүл болон Бүсан хотуудад зохион байгуулах гэж байна.
Уг өдөрлөгийн онлайн мэдээллийн ивээн тэтгэгчээр biznetwork.mn, now.mn, gogo.mn, mglclub.com, labornet.mn вэб сайтууд ажиллаж байна.

“Цахим Өртөө Холбоо” ТББ

Хаяг: Мэдээллийн Технологийн Үндэсний Парк, 427 тоот
Бага тойруу 49, Улаанбаатар хот, Монгол улс
Утас/Факс: +976 (11) 312920, +976 99071169, +976 99188889
И-мэйл: tsahimurtuuholboo@yahoo.com, holboo@tsahimurtuu.mn
Вэб: www.tsahimurtuu.mn